Heb 3 | AOM | STEP | Christian aganomë God-ro uëvadeje jemë'o hesinö jëvojöro. Ëhuni Iesu uehorovo avohore. Iesuro God-are ihore jöe majahuijajeje. Hu nosi priest börömohoje. Ëhu'ëro noro hu mae uehorovoromo hesi jöho huruoho majëhijarueje.

Hebrews 3

Iesuhu Moses iosiramiromo böröme jiaje jöhoje.

1 Christian aganomë God-ro uëvadeje jemë'o hesinö jëvojöro. Ëhuni Iesu uehorovo avohore. Iesuro God-are ihore jöe majahuijajeje. Hu nosi priest börömohoje. Ëhu'ëro noro hu mae uehorovoromo hesi jöho huruoho majëhijarueje. 2 Huro God-are örire muoho baeromo ë muoho avoho vaenövadeje. Urimë'i Moses-hu God-are mu avoho vaejahoromo God-are aribövie aho'o muebejëvonövadëhi Iesuro ëhi gemuoho ë'adeje. 3 Röhu Iesuro Moses iosiramiromo iho börömoho baejë'eje. Ëhesi bëhoho Moses hu ma-God-are agane gemuoho jio'i Iesu hu God-are agano gagovade aeje. Ëaganoho gagovë'ëro ëhu'ëro Iesuare ihohuro Moses-are ihoho iosiramijë'eje. 4 Agane gö gö bogo ëma jio'i aëro gagovoromo gemuoro nugo'amë'eje. Agano gagovoromo bövi bise'o avoho'amade aho God-je. 5 Moses God-are mue vaejahaje aëro jië'ëro God-are agano ioro'iorohu'o hiromo hesi muoho avoho vaenövadeje. God-are muoho avoho vaeromo God-hu ijonö majahui'iröhe jö jiajëhi jië'e jöho huro urimo ae majëhinövadeje. 6 A'i Keriso bogo ma-mu vaejahaje aehu jio'i hu God-are Harihe jiadeje. Hu God-are Harihëro jië'ëro God-are aganoho avoho muebe'amajeje. No'o God-are agane javue. God-hu maro ramuoröhe jöho bogo vuonugo'i biririvoromo nimorohë'i uehorovobe va'ë'ohuro ëhuro no ëhi javue.

God-are ariböviehu nuho'iröhe jöhoje.

7 Ëhuni God-are Aru'aho hesi jöho avoho ejahore. Hesi surire jöho ëhi uvë'eje:

Ave jaruvore majaroho God-hu majëhijaje jö hejë'iroho
8 nadi hia'oho biriri'övorëjo.
Jemesi hijo miono'ehu hia'i biriri'övoromo God na'o muorovarëhioho
nadi ëhioho ë'orëjo.
Jabuhu a rumo'e sa'are raromoromo God nasi dë bijioho gavarëhioho
nadi ëhioho ömorëjo.
9 Jemesi hijo miono'ohuro nasi mu masijo gabe rovaroho ëho bogo uehorovo'i
nasi dë bijioho gebe rovaroho vadune 40 barëjade höjo.
10 Ëhuni God naro ë aribövi jabesi örire bijönimoromo uvode höjo:
Majae ëhi jabumë dë vövöbajo'ere sisë'i uehorovo'i
nasi mu hesi öroho bogo avoho baeruomë'e höjo.
11 Ëhi uvoromo naro dë vörönegamu jöe darugo'o jövoromo uvode höjo:
Jabumë bogo na'oho ro raromoromo nuhoruomo'ajëjo. Bogo mae bogajo.
12 Agonomë ëhi jajivë'e jiaje ëhuni gavë'i raromore. Jemë a ioro'iorohuro God bogo ma uehorovarue uehoro sisëho baeromo ëhuro darugo'e aho God vuonugo'aruje. 13 A'i göëro göho jögore mamirovore. God-are surire mami'e adahare jöho uövuë'eje: Ave jaruvore majaroho nadi hia'oho biriri'övorëjo. Ëuövuade jaruvore majaho bogo barëjë'e jiaje evaro majae ëhi göëro göho jögore mamirovore ëhuro jemë a ioro'iorohuro sisëho garomo bogo simane huotorovoromo ëhioho hia'oho biriri'övo'irarije. 14 Jögoru mamirovo'irarije hesi bëhoho noehu aevo'i biririvoromo mae uehorovarëhi jië'e uehore gemuoho ma'eno titimobe va'ojuvo majae barëjamu bogo vuonugë'ohuro ëhuro no Keriso'o gemu mae javuajeje.

15 God-are surire mami'e adahare jöho uövuë'eje:

Ave jaruvore majaroho God-hu majëhijaje jö hejë'iroho
nadi hia'oho biriri'övorëjo.
Jemesi hijo miono'ehu hia'i biriri'övoromo God na'o muorovarëhioho
nadi ëhioho ë'orëjo.
16 Röhu rahumëro jöho heromo ri'öromo God'oho muorovareje. Moses-hu Egypt sa'are jioromo söjëvo rovade aribövioho ae aho'o jaburo huotorovoromo God'o muorovareje. 17 O God-ro rahumesi öriroho bijönimobe rovadoho vadune 40-ho barëjadeje. God-ro mu sisë vaeruomaje aribövioho bijönimadeje. Ëaribövioho sisë vaeruomë'ëro ëhu'ëro a rumo'e sa'are vuovo momorö'öbe va'oruomadeje. 18 O God-ro jöe darugo'o uvadeje: Jabumë bogo na'oho ro raromoromo nuhoruomo'ajëjo. Bogo mae bogajo. Ëho rahumesi jöho jövadeje. Jö bogo ejahare aribövi jabesi jöho jövadeje. 19 Ëhu'ëro jië'ëro no garomo uvö: Nosi hijo miono'ehu bogo ma uehorovarohuro ëhuro jabesi sa'are va'o nuho'iröhoho bogo eni jëvade höjo.